काठमाडौं :
हिमाल पर्वतारोहीमा फिल्म ‘एक्लो’का अभिनेत्रीहरु एकपछि अर्कोले सफलता हात परिरहेका छन्। अभिनेत्री तथा पर्वतारोही दियाले युरोपको सबैभन्दा अग्लो शिखर आरोहण गरेकी छन्। कविता नेपालीले नेपालको सगरमाथा सफलता पुर्वक आरोहण गरेलगत्तै दिया पुनले युरोपको सबैभन्दा अग्लो शिखर, माउन्ट एल्ब्रुस ५,६४२ मिटर सफलतापूर्वक आरोहण गरेकी हुन्।
उनी जुन १० तारिखको बिहानमा टेजन गुरुङ (एलिट एक्सपेडिसन) र रसियन गाइड लिउन अताबिएभ र एड्गरसँगै शिखरमा पुगेकी हुन्। यो अभियान एलिट एक्सपेडिसन प्रालिले आयोजना गरेको थियो। यस उपलब्धिसँगै, उनले ‘सेभेन समिट्स’ चुनौतीमा, सात महादेशका सबैभन्दा अग्ला शिखरहरू चढ्ने आफ्नो महत्त्वाकांक्षी लक्ष्यलाई अघि बढाएकी छन्।
अहिलेसम्म पुनले सात मध्ये चार शिखर सफलतापूर्वक आरोहण गरिसकेकी छन्। माउन्ट एभरेष्ट (एशिया), किलिमन्जारो अफ्रिका,अकोंकागुवा दक्षिण अमेरिका र अहिले माउन्ट एल्ब्रुस युरोप हो। उनका आगामी लक्ष्यमा कार्स्टेन्स पिरामिड (ओसियानिया), डेनाली (उत्तर अमेरिका), र माउन्ट विन्सन अन्टार्कटिका समावेश छन्।
दिया पुनले आफु अभिनित प्रदर्शनको तयारीमा रहेको फिल्म ‘एक्लो’को पोस्टर र नेपालको झन्डा साथमा लगेकी थिइन्। उनको अभिनय रहेको फिल्म अहिले चर्चामा छ। केहि हप्ता अघि मात्र फिल्मले कान्समा स्टल राखेर चलचित्रको मार्केटिंग गरेको थियो। कान्स पछि ‘एक्लो’ को चर्चा बढेको छ।
